Сентябрь медводдза лунӧ пасйӧ ассьыс гӧгрӧс пас Сордйывса ань Игнатова Альбина Михайловна.

Талун сылы-90! Чолӧмалам! Альбина Михайловна зэв на збодер, варов, окотапырысь юксьӧ аслас олӧм йылысь. Вот и висьтыштам тіянлы сылысь оланвизь туйсӧ.
Чужис сійӧ Сордйыв сиктын. Вит чоя-вока. Война вылӧ нуисны семья вердысьӧс- батьнысӧ. Альбиналы вӧлі сӧмын на 6 арӧс. Бать пыр жӧ вошис , бӧрсӧ эз лок..Тайӧн лёкыс семья пытшкын эз на помась. Тшыг челядьлы содзтыр тусь ӧктӧмысь судитісны и мамсӧ. И сійӧ дзескыдінысь бӧр эз во. Кувсис сэн. Пӧрысь ыджыдмам вылӧ ӧшйис став сьӧкыдлуныс. Альбинаӧс чойыскӧд нуисны детдомӧ . 9 во нывка быдмис детдомын. Детдомсянь мӧдӧдлісны Нювчимӧ, чугун вӧчан завод вылӧ. Формовщицаӧн во уджалӧм бӧрын, нывкалы удайччис эновтны тайӧ сьӧкыд уджсӧ и бӧр воны Помӧсдінӧ. 16 арӧс сӧмын на тыри. Зэв ӧдйӧ сюри сэн удж- босьтісны журнал-газет лэдзан типографияӧ. Уборщицасянь нывка кыпаліс наборщица-верстальщицаӧдз, а сэсся и бригадирӧн индісны. 9 во да джын тані кадӧн артасьтӧг мырсис ань.Кор типографияыс вӧлі Сордйылын (Миш Тина керкаын), весиг битӧг на уджалісны, керосин лампа улын. А печатнӧй станоксӧ кипомысь бергӧдлісны.
1962 воын Помӧсдін район бырӧмкӧд ӧтпырйӧ тупкысис и типография. Тайӧ кадсянь Альбина Михайловна пенсия вылӧ петтӧдз 30 во уджаліс Помӧсдін больничаын санитаркаӧн. Оні ань олӧ Помӧсдінын ныв дорын. Нель внук-внучка да нӧшта нель правнукъяс кытшын.
Сиам Альбина Михайловналы здоровье да кузь нэм. Чолӧмавны юбиляршаӧс волісны Помӧсдін администрацияӧн веськӧдлысь Анатолий Егорович Уляшев да ветеранъяслӧн сӧветса председатель Карманова Нина Ивановна. Чолӧмалана кывъяс да козин ыстісны Кулӧмдін районса ветеранъяслӧн сӧветӧн веськӧдлысь Елена Александровна Сазанович.