Туьркке кеткен ногайым сагынгандыр тогайын.

Туьркке кеткен ногайым, кайтип сизди мутайым?
Термелеринъ тарткышлап, ни дорбаларга тыккансынъ..
Отяганъды аявлап, ызгы кере яккансынъ..
Шыбырткынъды коьтерип, коьк атынъа ургансынъ,
Кекелинъди кетерип,белге бекинъ салгансынъ.
Ата юртын калдырып, кайда кетип баргансынъ?
Эки тизинъ талдырып, буькирейип алгансынъ.
Неден Туьркке кеткенсинъ, коьк тенъизди оьткенсинъ?
Коьгемлигинъ калдырып, ерди етим эткенсинъ..
Йолак юзден яс агып, йылай эди калганлар,
Юрегиннен кан тамып, коькиреги толганлар.
Артынъыздан тыгырды, етейим деп шоьл кавмак.
Эссиз анай йыгылды, йок ога энди турмак..
Ер мен коькти коскандай авдарылды дуныя,
Артта тегис шоьл яйрады, алдыда таслы кая..
Ай, йигитлер, йигитлер, уьзилдилер уьмитлер,
Артка кайтув энмеек, баьтирлер кайтып келмеек.
Туьркке кеткен ногайым, ят ерде ятып калдыма?
Туьркке кеткен ногайым,наьсибинъди таптынъма?
Туьркке кеткен ногайдынъ шоьлде калган ызыман,
Етим калган тогайдынъ бир йырлайган кызыман.
Буьгуьнлерде мунъайып, сизди ойлап тураман.
Тамырымнынъ энъ туьбин коьрмеге заьр боламан.
Туьркке кеткен ногайым тилди, динди мутпаган.
Тек неге ди эс йыйып, артына ол кайтпаган?
Салимет Майлыбаева, 2013 йыл.