ЭДИЛДИ АЛСА — КОБАН БАР

Сосы ятлавды Казтувган XVII-нши оьмирде Ем, Яйык, Эдил бойларын джунгар баскыншылар басып алганда язган.
Яйыкты алды, Емди алды,
Эдилди алды, Тенди алды,
Энди алмаган не калды?
Агалардынъ колыннан
Талпый турган кусты алды,
Энди алмаган не калды?
Басы сайын баславлы,
Баславынынъ
Басы сайын кыславлы,
Кара-Дуван
Масак деген ерди алды,
Энди алмаган не калды?
Егерине бу аьнжи
Айыры оьркешли туье алды,
Саварына бу маьнжи
Сайлап-сайлап бие алды,
Энди алмаган не калды?
Шайына салар май алды,
Шайкап ишер туз алды,
Энди алмаган не калды?
Буршаладан коьйлекли,
Буркысыган йыпарлы,
Бурнында
Дана куьмис алкалы,
Тамагынынъ астында
Сары алтын туьймели,
Айга, куьнге тиймеген,
Аьдем бетин коьрмеген,
Онъ беттеги аьруьвге
Тиеязып аз калды.
Емди алса — Яйык бар.
Яйыкты алса — Эдил бар.
Эдилди алса — Кобан бар,
Кобанда
Айыры куйрык сабан бар.
Кобанда
Тарам-тарам тогай бар,
Тогай толы ногай бар.
Бар табылар — йок кетер,
Эсен колга мал битер.