Хусувэй поʼ ӈамгэриˮ манзаяхаˮна сертавндидоʼ неранда тасламбидоʼ. Тиканда ханеваˮ серодоʼ сававна мимандоʼ еˮэмня ӈахакуд манзаранаˮ падродоʼ сертабиˮ. Халэданаˮ организацияˮ сямбирувна халямʼ няˮмарпавамʼ тедаʼ тэнзтоʼ серʼ таславэдоʼ.
Яхаʼ идеˮмана ёртаˮ: плотвамʼ нюбетаˮ халэ – 5,5 ёнарˮ тоннаʼ пирувна, пырямʼ – 3,4 ёнарˮ тоннаʼ пирувна, лысумʼ – 2,8 ёнарˮ тоннаʼ пирувна, нёямʼ – 1,5 ёнарˮ тоннаʼ пирувна ӈыдабаӈгудоʼ.
Ямалʼ янаˮ тоˮомнаˮ ханенаˮ тянёркавна ханеӈгуˮ. Пырямʼ – 839 тоннаʼ пиратʼ, лысомʼ – 719 тоннаʼ пиратʼ, падвы халямʼ – 659 тоннаʼ пиратʼ, плотвамʼ нюбета халямʼ – 399 тоннаʼ пират нэкалпа сава ӈэӈгу. Тикыʼ хавна тамна хуркариˮ нюдяˮ халэ няˮмарпаӈгуˮ: ӈартиʼ халямʼ, падвы халямʼ.
Сямянхат тянёвна няӈгэхэй халэ – 1,79 тоннаʼ пират няби судакмʼ нюбета халэ – 4,9 тоннаʼ пират няˮмарпадаˮ ӈэӈгуˮ.
Похоˮ ханенаˮ организацияˮ таремʼ хомбдидоʼ халямʼ няˮмарпадаˮ заводахаˮ митерпидоʼ. Ямалʼ янаˮ ӈарданʼ сидндет юкад вата тарця заводˮ таняˮ. Хусувэхэт халямʼ няˮмарпава манзаиˮ няюʼ таранаˮ ӈаво несэймдамбиˮ, едэйˮ серо ӈадимдембиˮ, Тарця ӈавоˮ нямна хусувэхэт юн мание тараˮ.

Алла Вануйтоʼ падвы
Сидяӈг: Марина Ярʼ тадтавы