Саваʼʼ ненэциенаʼʼ яʼ ханярина таняʼʼ. Ӈобʼʼ тарця не иландаʼ ямбанʼ Ямалхананаʼʼ, Сё-Яхаʼ хардахана иле. Тикы ‒ Окотэтто Тамара Очевна. Харта яхананда хусувэй хибя теневада. Тэриʼ мэна ни ӈаʼʼ, ӈарамзь, тедаʼ ӈодʼʼ илебяды. Ханя тарця ӈаʼʼ, ӈахат манзара тохобэй ненэцьʼ.

Пыда ты пэртиʼ мякана ёнаркад вата хасаваюрʼʼ тет юʼʼ няхаромдей поʼ тыʼʼ ниць ирыʼ 30 яляхана соявы. Нисяда ты пэртя ӈэвы. Тиканда хавна ӈэрмʼ няӈы ямʼ манэсартаʼʼ пидиця ядэлавы. Таʼ выӈгад харданʼ недвотаванзь хаʼʼмормы. Тэхэʼʼна илебта ӈодʼʼ тальцюна халямʼ пэраць пявы. Небяда мята пэрмы, нюда вадабавы.
Тамара Очевна Сё-Яхаʼ хардахана тет классмʼ малеʼʼмахаданда манзара пэвыʼʼ. Хэвхыʼʼ няхатата серкʼʼ тохоʼʼмахаданда, пыда ӈаварʼʼ пирембадаӈэ школанʼ таралмыʼʼ. Ӈамгэʼ пиркана «Красный Ямал»ʼ колкозʼ ӈэвахана мэна тарця харбю неʼ ӈацекымʼ Ханты-Мансийсканʼ тохолкованзь ӈэдаравэдоʼ. Танянанда тён вадабава сертʼ тоходанвы. Таремʼ тохолкоʼʼмахаданда малеʼ сян ирыʼ Самбургʼ хардахана совхоз «Пуровской»хана таромʼ хаʼʼаврамбавы. Пунаʼ Саляхардахана пыхыдамда носи вадаба тохоламбавы. Таʼ мальӈгана хардахананда тёнʼʼ мядʼʼ тин сертаба пявыʼʼ. Нюртейʼʼ носи няхарʼʼ нёлеко самолётхана Сё-Яхаʼ харданʼ тэвравыʼʼ. Таремʼ ненэциеʼʼ поӈгад нюртейӈэ носи вадаба пэвыʼʼ.

Хареʼʼ нюда небямдоʼ индя яданʼ манзаранаӈэ теневадоʼ. Ӈарка хасава нюда, Михаил Николаевич совхозʼ носиʼʼ вадабалвахана инда яданʼ нядаӈгосетавы. Пыда таремʼ лаханась:
‒ Тамальӈгана небяваʼʼ тохоламбадада ӈока ӈэсеты. Носи вадабава, ӈавламбава, тецьдахана носиʼʼ ню илебтембава нензелʼʼ серʼʼ ни ӈаʼʼ. Небяваʼʼ планмʼ томдаба хусувэхэд няркомбасеты. Таремʼ тяхасовна манзараванда няюʼ хуркариʼʼ ненадумдаʼʼми няʼʼмарпись. Ӈарка янаʼʼ нермбэртяʼ марцьхыʼ табековна «Ветеран труда» ненадумдмʼ няби медальмʼ няʼʼмась. Мань нянани, ӈаркамбойхаваӈэ ваʼʼлёй ӈэвада ӈулиʼʼ саварахась. Тедаʼ ӈодʼʼ табекода мань тароʼʼян.

Тикы хавна мятаʼ терʼʼ иламʼ нерняʼ минревы. Хасава нюхуюда, Игорь няби Станислав тарцяʼʼ вади мэʼʼӈаханзь: «Нисяхаюнаʼʼ, небяхаюнаʼʼ няʼ мяканаʼʼ выӈгад ӈобӈгэвʼ ненэциедиʼ тэворцетыʼʼ. Хусувэй няндиʼ тэвнамдиʼ ӈамгэриʼʼ серкаʼʼна нядасетыдиʼ. Пыдиʼ сяхариʼ ненэцие нядаба сиднаʼʼ ӈодʼʼ табэдамбасетыхыʼ. Тедаʼ небяваʼʼ тэри ненэцие ни маниеʼʼ, хибяримʼ пирмандаʼ пирувна нядаӈгуда». Ӈолери не нюда Оксана ӈулиʼʼ савуʼʼӈада: «Небями мань ёльце сава нями. Яляʼ няʼ ӈэда серкʼʼ сиʼʼми табэдамбасеты. Сяхариʼ ниниʼʼ нядабасетыниʼ. Ненэйвана ӈобтʼ тэворпанаʼʼ помнанаʼʼ ӈацекы ӈэванаʼʼ мальӈгы илмаʼʼ тензибтембасетываʼʼ. Таʼ ёльцяӈгананаʼʼ ядхананда ӈаниʼ ӈацекэрхаваʼʼ ӈэсетываʼʼ. Сяхаринда небя танябʼʼ, нюӈэ ӈарка ненэцяʼ ӈэбанаʼʼ ӈодʼʼ, ӈаниʼ нюдяӈэ ханʼʼӈаваʼʼ. Тедаʼ мань нюниʼʼ няни лаханабтоʼ нюртеʼʼэʼ хадандоʼ хурка ӈэвамʼ хонрасетыʼʼ. Ханяӈэхэна помнандоʼ лаханако пэбʼʼтоʼ нянандоʼ ӈаниʼ хибяхарт ниʼʼ тарасетуʼʼ. Тедаʼ тамна нюниʼʼ нюʼʼ сянакултамбавамʼ харвобта. Тарабата етриʼ лэтамбасетыда. Тикыд хадандоʼ небямʼ ёльце мэнедоʼ. Ханяӈэхэна няндоʼ сырап, няднаʼʼ саць мэненархыда ӈэсетыда. Небяваʼʼ тамна понʼ яляʼ сэвмʼ маниея, маняʼʼ нюӈэ, нюнаʼʼ нюӈэ тамна хэвхананда ӈацекыдаванʼ харваваʼʼ».

Сёяхаʼ няна манзарана Игорянда хасава ню Иван хаданда нямна маʼʼнисяв:
‒ Хадами мянаʼʼ терхана ‒ ялянаʼʼ сэвʼʼ. Мань ӈулиʼʼ сава нями, сяхаринда ихинани ӈамгэ вэвани танябʼʼ ӈота ӈодʼʼ нянда ядсетыдмʼ. Нянанда илаʼ нямна лаханакуроʼʼмахадани ӈобкарт вэва иӈуд сёнзяни мюня ни хаёсетуʼʼ.
Нюда тедаʼ ӈарка ненэцяʼʼ, малʼʼ мядʼ терсавэйʼʼ. Хусувэдоʼ харта манзаямʼ няʼʼамби. Сиддоʼ тидʼʼ вадабавандаʼ еʼʼэмня «Медаль материнства»мʼ няʼʼмась. Тикы ӈарка мядʼ терʼ не сяхариʼ нита хэвхана мэ. Сёнзянда лимбякамʼ намдуванзь нюда етриʼ хэвханда тэворӈаʼʼ.

Пыда нюта ню вадаба сяхариʼ нядаӈгусь. Ӈацекыʼʼ хадандоʼ нямна савариʼʼ вада мэцетыʼʼ. Небянанаʼʼ едʼ ӈэванда ӈарка яляʼ няюʼ еʼʼэмнянда сава вади хэтыбиваʼʼ. Няваʼʼ сенз ӈэя, таӈга илея. Сёнзянда лимбикахана янаʼʼ яляʼ ядёдаревʼ хусувэмда юдабая, лэтрамбая. Хэвхананда мэнаʼʼ нида нянда сяхариʼ маямбаяʼʼ

Ӈюдяне Махакуёʼ падвы
Сидяӈгʼʼ: Оксана Окотэттоʼ тавыʼʼ

#Ямал#НяръянаНгэрм#ннецкийязык#деньматери