Ханяӈы’’ нюсавэй’’ ненэця’’ едэй ӈадиберта’’ серо’’ сер’ тэри лыдабтарёдараха’’ ӈэӈгу’’. Ӈани теневана хибярим’ хонравдавэй’ вадёдана’’ ӈацекы’’ ханзер’’ табэдавам’ нидо’ хамэдаӈгу’’. Россия’ яна’’ общество «Знание» ’ няби Росдетцентр’ манзаи’’ серо пэртя’’ тарця тидхалёда тасалкован’ ненэцие ма’’лаць.

Пили’’ нерде садикха’’, школаха’’ ханта’’ нюсавэй’’ хибяри’’ ед’ нядоӈгова’ серо ваде’’ӈаць. Новосибирк’ няд товы Елена Богданова нюсавэй ненэця’’ ӈацекэхэ’’нато’ манзаранито’ нямна вади хэтась. Пыдо’ ӈобнзер’ ӈэвандо’ е’’эмня мале сян табеку’ вади’’ нямна лахарём’ минресь. Хэтвыда ин’ сававна ха’’мыдаць. Форуман’ ма’’лёвы’’ ӈани’ ӈопой лаханакурць ня’’мы нядо’ Россия’ яна’’ юнета сёбар’’ не ‒ Светлана Хоркина. Мядондандо’ ваде’’мэвна, ханяӈэхэ’’на ӈацекым’ табэдамбава’, тидхалембава’ мальӈгана ӈока табеком’ мэ’’ма’ мян’ ни ӈа’’. Ӈарка ненэць’ вадёдана хибям’ хари’’ сертабада’’ сава’’ серк’’ната тидхале пир’’ӈада. Ӈани’ ӈоб’’ товы нядо’ хуркари’’ тасламбадито’ хавна ӈацекы’’ интернет’ серо тоса мэ’’мандо’ нямна лаханась.

Тикы яля’ ма’’лёвы’’ табекодамдо’ хэвнярид ниць ӈате’’. Харто’ пэртя’’ серодо’ ваде’’ӈаць. Нидо’ торомдамбиць, тохолкуць. Помнандо’ хуркари’’ хамэда я’’амна’’ серодо’ тасламба нядаӈгуць. Мякато’, яхато’ тэввандо’ сер’ намдвыдо’, манэ’’мыдо’ ӈани’’ няхато’ вадетыдо’. Ӈацекыдо’ вадаба, тидхалемба ненэця’’ теда’ нерняӈы иламдо’ ӈобнзер’ ӈэсь мимбидо’.

Автор: Алла Вануйто