газета "Няръяна Нгэрм" и "Мынико"
Хэвы си’’ив ӈоб’’ юнета няхана’’ тэворӈаваць. Пыда культура’ мякана мале ӈока по’’ хыно’’ӈа, тара. Тикы сёнзяда лата, сейда лимбика ненэць’ ‒ Елена Хабиевна Уфимцева. Манзаралва пирця харданда лохо’’омна сидна’’ ядэлаванда сер’, харта иламда ваде’’ӈась. Лахарёмда тарем’ пядась:
‒ Мань Тибичи’ мякана соявэдм’. Та’ мальӈгана ёнаркад вата хасава юр’’ самляӈг ю’’ матдомдэй похона носидалва’ иры’ 6 яля ӈэвысь. Нисяеми ‒ Хаби Лаулевич Тибичи, илебей ненэць’ ӈэванда мальӈгана саювхат ява’’ ӈэдабавы. Небяеми тамальӈгы’’ похо’’на сайнорманзь хэвы некамда тадаба таряхыманзь ядэрцетвы. Тарем’ мята тер’’ ненэциеда нядабавы. Сайнорма’ по’’ пуд нисяхаюни’, небяхаюни’ ӈоб’’ мяд’ терӈэ хэвэхэ’. Хаби Тибичи хабт’’ мякана ты’’ пэртяӈэ таравы. Ӈани’’ нита’ ня’ Еръя’ хардахад Саля’ харад’ ӈэсонд’, пуня’ почтам’ тэвабавы’’. Сыра’ таряхынзь сисьда пэдари’’ няю’ ядэрцеты’’. Тальцюна халям’ пэрманзь ха’’мыдаць. Халэндаванзь яв’ сер’ ӈанохона мяд’ терсавэй ӈобкана мюсерцетыва’’.
Сибимдей понда минзь школан’ ӈани’’ нида няць нюдякоця ту ӈанохона Еръяха’ хардан’ ханавэдо’. Танянанда, вадёдаванда сер’ хуркари’’ илека’’ ӈамгэхэ’’ тоховы. Тамальӈгы’’ пота’ нямна тарем’ лаханась:
‒ Тохолкована’’ мальӈгана сидна’’ кинохо’’ хан’’ласеты’’. Неноховавна тарана’’ ненэця’’ ӈули’’ сававна ихини ха’’морцеты’’. Мань ӈани’ тарем’ тараван’ харвасетыдм’. Ӈадьбяни си’’ни ӈар’’ нини’’, тамна нюдярка не ӈацекы ма’’лахая тарабцони манэ’’лабтамбасетыдм’. Хар’’ни и’ ӈукдани хомбавыни’’ сава ӈэвыкы’’, нивыкы’’. Тарем’ ӈод’’ мань тарава’ сер’’ нямна ибедорӈадамзь. Пуна Саля’ хардан’ култпросвет училищан’ тохолко пэйваць. Тохолкоб’’на’’ училищаханана’’ хар’’на’’ «Северный танец» таралава манэ’’лабтамбава группава’’ танясь. Хуркари’’ я’ сяр’ нина илена’’ ненэцие’’ тэнз’’ тарабцо тохоламбасетыва’’. Тарця’’ серк’’ тоходанвами нянани ини ватось, концертаха’’на хусувэхэт тарасетыва’’.
Ханзер’’ «Сыра’ сэв»ан’ тэввамда няна’’ тарем’ ваде’’ӈадась:
‒ Пудана по’ тохолкоб’’ни, училищахана’’ Леонид Павлович Козырь «Сыра’ Сэв»хана таравдадамда пюванзь турӈась. Мань ОЦНКхана 1978 поход, тев’ тенат’ манзарадм’. Ӈыхы товани’ мальӈгэхэд хуркари тарабцо хари’’ тохоламбасетыва’’. Ансабляханана’’ манзараб’’на’’ яна’’ марк’’ ядэрцетыва’’. Ӈани’’ пареӈоди’’ яха’’ ханцетыва’’. Си’’ив по, 1991 поход «Сыра’ сэв»‘ ӈарктаӈэ тарадамзь. Тальцюна ОЦНКан’ турта’’ ӈацекы’’ ня’ ‒ ӈэрм я’ тер’’, ӈани’’ ненэцие’’ тарабцо «Студия Северного танца» нюбетахана тохоламба пядамзь.
Ӈацекэхэ’’на тарабцо’’ серо тохоламбвада сава серк’’ сита тэврась. Ӈани’ ӈоб’’ сава нянда ня’ ‒ Татьяна Лар, ӈэрм’ тер’’ илебей’’ ненэцие’’ сёетава’ е’’эмня группам’ серта идевэхэ’. Елена Хабиевнамда сё мэць няданда хонравэда. Тамальӈгы’’ ибедоро’’мида лаханакурць няна’’ хуркари’’ ӈэвыць:
‒ Тикы нерня сабе сём’ мэтадм’ вуньсядм’ ӈа’’, ими ханзели’’ хан’’ӈась, тамини ханзер’’ ӈацекэӈэ няна’’ ӈавна хадаени сё мэ’’мами тензибтедамзь. Небяни няюд’ ӈэда’’ нени’’ харто’ ӈод’’ мал’ сёетэй’’ ненэцяць. Янамбовна Татьяна Нюдяхасововна ня’ сё мэць ӈоб’’ пэйни’. Теда’ маня’’ ӈани’ тодо’’ ё’’мана ядэрцетыва’’. Ӈацекыни’ тюкохона тохолкова’ серодо’ мале’’мяхадандо’ илна’’ саирм’ нерня’ минрени’’ поӈгана манзаранаӈэ тара’’. Ханяӈыдо’ мяк’’нато’ харто’ ансамбльдамдо’ ма’’ламби’’. Ӈаха’’на мэб’’нандо’’ ӈод’’ тев’ тенат’ табеко’ вадам’ сидяӈэ нядни’ хонрамбасеты’’.
Маня’’ редакцияна’’ терӈэ сёётэй ненэй не няхана’’ сава вади мэ’’ӈава’’. Елена Хабиевна, сяхаринда мэта сёхонанд сэреро лядпин, хэ’ тире ланомдамбин, ненэця’ сава вырам’ тидхалембин. Пили’’ тарцян ӈа’’!
Автор: Нюдяне Махакуй
Комментарии 3