Тохолкода’’ мале ӈатенавыць. Сиддо’ ӈарка лохо’ мю’ ма’’лавыць. «Ямал-ню’’на’’ я!» ассоциация’ ӈуданда Эдуард Яунгад нерандо’ няд вадамда мэ’’ӈась. Пыда ма’’нисяв, сяхаринда нерня’ ӈэсь тара. Теда’ пыдара’’ тохолковарим’ нида’’ минре’’, нерняӈы мэ’’манда иламда’’ тасламбида’’. Хусувэй пяванда сава сер’’ сяхаринда илаӈгананда’’ тид’’ ха’’маӈгу’’. Теда’ вэвам’ пяб’’нанда’’ ӈани’ тарця ӈэӈгу. Маня’’ Ассоциациява’’ е’’эмнянда’’ хуркари тарана ӈавэ минре, тикахат теневабта’’ сава. Пыдара’’ харе’’ пыхыдата’’ е’’эмня ӈани’ таром’ ха’’аврабата’’ серо’’ӈа. Эдуард Хабэчевич тамна хуркари ӈавэ хэтась. Илебей’’ ненэця’’ тэри мунзипой’ инзелець.

Си’’ив Харв маркана «Ямал-ню’’на’’ я!» ассоциациям’ ня’’амбада Зинаида Митрофановна Девяткова тарця вади хэтась:
‒ Тохолкодина’’ хусувэй по’, сельбя’ няна лаханако няйна’’. Сяхаринда нерде товына’’ мун’ тяха’ ӈэван харва’’. Саць вэвадо’ нюдя пэвдей иры’ ӈэсонд’ ни’’ тэвор’’. Мале питарцетыдо’. Ханяӈыдо’ илелава’ мяктато’ пимресетыдо’, пуна тикыд няни турӈа’’. Тарем’ ӈока хибям’ тедаваць. Ӈаркакоцяӈэ хэ’’мяхадандо’ серо хамедамбидо’. Етри’ нядабина’’, ӈобкартамдо’ нива’’ тэри хаебю’’.
Пуна сёбар’’ пирдыраць пэйдаць. Ныхыдырӈаць. Тарця пирдырми теда’ округна’’ тиӈгывна ханярина мэйдо’. Тохолкода’’ соходо’ Ямальской район’ тер’’, ӈокадо’ ненэй ненэця’’.

Нерня’ ха’’амвыдо’ «Ямал-ню’’на’’ я!» ассоциация’ ӈуданда Эдуард Яунгад’ ӈудахад мядонзэй ня’’маць. Ӈоб’’ яля Си’’ив Харв маркана илебей’’ ненэцие’’ поӈгана мэваць. Пыдо’ нерняӈы иландо’ нямна няркнавандо’ хавна тамна сёбар’’ ӈэвы’’.

Автор: Марина Ярой