Округханана’’ халям’ пэртя’’ предприятийха’’на хасава’’ иры’ ямбан’ си’’ив ёнар’’ тонна халям’ ӈыдавы’’. Тикадо’ вадавнандо’ ӈани’’ пото’ пир’’. Хэвы си’’ив яляхана ёрти’’ поӈгана хибя сяӈок халям’ ватава пунумась. Сямянхат ӈокам’ Приуральской районхана ненэциедо’ ‒ 1 885 тонна халям’ ватавы’’, тикадо’ небой пон’ тасла ӈарковна ӈока. Пудандо’ Пуровской районхана мэна’’ ‒ 826 тонна’ халям’ нэкалмы’’. Тикы’’ нидо’ тяхакуй походандо’ ӈани’ ӈокам’ ӈыдавы’’. Няхаромдэйӈэ Надымской районхана халям’ пэртя’’ еремы’’ ‒ 312 тоннам’ ватавы’’.

Халя’’ тэнз’’ поӈгат сямянхат ӈокавна пыри’’ еребермы’’. Ямална’’ тиӈгывна тарцяри’’ тэнзахат ‒ 2 301 тоннам’ ӈыдавы’’. Тамна ӈани сидя тэнз: ‒ лысу’’ ‒ 1 615 тонна, пайха’’ – 633 тоннаӈэ нэкалмы’’. Тикы’ хавна ханяӈы’’ халя’’ тэнз’’ ватаӈговандо’ ёльцяӈгана вадёвы’’, тарем’ лещ’’ ‒ тет’ пирувна ӈокмы’’. Ӈахат поӈгарпато’ ‒ 19,5 ӈэ’’мяхаданда теда’ ‒ 81,9 тонна’ ёльцянд’ поӈган’ еребермы’’. Теда’ таӈы ханесэйдо’ ёльце’’мяхадандо’ сыв’ няю’ хамекулыд’’. Тамна ю’’ тонна халям’ сыра’ салаба’ ӈыламна ватаванзь ватора’’.

Пудана самляӈг по’ ямбан’ тарем’ хане’’. Ямалханана’’ юр’’ пир’’ предприятийхана халям’ пэрӈа’’. Ханесэйто’ няби пелям’ округханана’’ мирдапидо’, тикахат хуркари’’ ӈавыдота’’ ӈавар сертаби’’. Ӈокаюм’ сохода тарця тарана серкана маня’’ ӈэрм’ тер’’ нина’’ илева’ манзара’’.

Лимбя’ ирыхыд вэба’ иры’ ӈэсонд’ ӈокханда си’’ив ёнар’’ тонна’ халям’ ӈэдавыць.

Автор: Марина Яр