газета "Няръяна Нгэрм" и "Мынико"

Ӈобнзер’ мэб’’нана’’ мэбе’’ӈава’’
Носиндалава иры’ 4 яляхана яна’’ ӈардан’ ненэцие’’ ӈоб’ няю’ ӈэва ялям’ мэ’’ӈава’’. Тикы яля’ ед’ хуркари илека фестиваль’’, ярмарка’’, концерт’’ сертаби’’. Сяӈок яна’’ тир’ нина тэнз’’ таня’’, таӈок вадавна лахана’’, сё мэ’’ӈа’’, харе’’ иландо’ саирм’ нёда’’.
Россия’ яханана’’ мале сян по’ техэ, невхы’’ ӈэвы’’ серо’’ сер’ тикы ялям’ ядабтамбидо’. Ӈока’’ по’’ тяхана ӈарка яна’’ ил’ тоенана’’, пунсяда’’ серк’’ теберӈась. Россия’ яна’’ ныхысялмам’ маниенадарев’, хамэданадарев’, ӈани’’ парэӈоди’’ яхат саюв’’ турць пэвыд’’. 1612 похона хэвняд товы’’ саюв’’ Москвам’ марманзь мале хамэдёвы’’. Тарця серм’ хамэдахава, Кузьма Минин няби Дмитрий Пожарской ямди’ ӈэдаванзь ненэцядамди’ ма’’лавэхэ’. Ӈобнзер’, ӈопой ныхым’ мэць саюв’’ мардавыдо’. Харто’ якоцямдо’ тарем’ лэтравэдо’. Тикы серо тенилӈэ мэ’’мана’’ е’’эмня 2004 похона Россия’ яна’’ нермбэртя’ ватохонанда тодо’’ тэнз’’ ӈоб’’ няю’ нятва’ ялям’ ненадумдась.