Дилта дямпан выӈкна мансԓаӈа. Владимир Игрумович Пяк выӈкна Ханымей҆ кӭвхана диԓе. Владимир Игрумович понанта «Верхне-Пуровский» совхозхана мансԓамы. Выӈкай ӈайватан, куԓкаԓи шеэмна мансди’’ мэш тамна нючаӈӭ тохомай. Дю’’ похонанта шаӈкмян ӈайватам чедимямай: ты’’ падеԓьш нета’’ няташтомай, каԓьта ӈайтаԓёмам, каньдямам чедимямай. Тамна ӈашкиӈӭ тэхэна мансԓаш чепьмай. Неԓьчеэй няна ты’’ падиԓта нета’’ нятапёштомай, тай’’ня чикехет тэхэна’’ мансԓанаӈӭ шита «Верхне-Пуровский» совхозан няаммай’’. Таньдёԓьшкана совхоз ты’’ ӈука’’ ӈаймай. Тэхэна’’ мансԓанна’’ мансдятоӈ дёԓьше шеэммай. Ненымана халаку’’ ‒ ты канунта’’, аппы’’ тадямэп вайма ӈӭштомай. Недяӈк маԓьшахана, пинԓюдю’’ дёԓьшкана ӈупчики тытоӈ тэтнаштомай’’. Ӈукадяай ты’’ ӈысым неша’’ писамэй веԓаштомытуӈ.

Владимир Игрумович куԓкали нумкна: чешчахана, дячапётахана, катхана, хаԓёхана тэхэната’’ мансԓаштомай. Тыта’’ нёташ шанат ӈуту коштомай. Тытуӈ шехе’’ вомаӈ тайхана, ты’’ падиԓта’’ неша’’ пон мюшаԓьштомай’’. Таньдёԓьшкана чукиӈ шеԓ минта’’ кан’’ дякумай’’, неша’’ тыӈ канԓихина тытоӈ ӈомтапёштутоньш. Владимир Пяк мансԓавшта ӈысыта пон хома патаԓт камаштуш. Кынԓмаӈ дёԓьшкана тэтуӈ ӈамши’’ планым чемнанта коштомытуӈ. Владимир Игрумович тэхэна’’ няхаԓдюкат ӈука пуӈ масԓаӈаш. Совхоз ты’’ ӈопт мэмахатоӈ, Верхне-Пуровский҆ шанԓи ӈысыта кыдишь. Куки таньняна тэхэна’’ мансԓамы’’ неша’’ каԓитанаӈӭ чепьӈаш. Ты’’ падеԓьш мансԓаманта путы Владимир Пяк ӈупчики каԓиташ чепьӈаш, каньдянаӈӭ мэштуш.

Тэхэна’’ мансԓаманта дёԓьшкана нюӈк нешаӈ няштуш. Няматаԓакуԓма дяԓяхана ӈайтаԓёчи’’ поӈкна ӈайвахай’’ местаха’’ камаштуш, шанакош мянаԓта’’ нешай’’ поӈкна нэхэԓьштуш. Мансԓаманта дямпан ши’та кӭвхананта мэнадюм няташту. Пушанта Зинаида Пяк няӈ четдю’’ шеэв пуӈ хома шоньшахана, нуп вив мэш неч няш диԓиӈахаӈ. Мат нюч ‒ няхаԓтуӈ касама, няхаԓтуӈ ‒ ни’’. Тотуӈ нюсамы’’, чиԓьниймана дилмтуӈ минԓена’’ неша’’. Владимир Игрумович дёԓьше меԓь нешаӈ. Канну’’, ԓампи’’, пяй ӈану’’ мешту’’, тыншаӈу’’, дямчу’’ паӈкаԓьшту, топдями’’ шеԓташту’’. Куԓкаԓи’’ выӈкай мансди’’ шеԓтапёшь тамна нючаӈӭ тохомай. Пушадюм Зинаида Ильмовна ӈупчики ӈайвапата хата, пимшата ни. Хайтуԓамам чедимяӈа, куԓкаԓи паным, пемам хӭтпата дёԓьше меԓят’’ ӈӭшту’’.

Владимир Пяк пушанта няӈ нич’’ шаӈкмян выӈкай мансдян тохоԓайчаньш’, таԓям четаӈ куԓкаԓи ӈайватам шеԓтамам чедимяӈа’’. Четаӈ пушаӈ няӈ пеншихина мэӈахаӈ. Каса нюхунач диԓиӈахаӈ. Каԓьтуӈ тытуӈ ԓэтпёта’’ нич’’ нятапёштухуӈ, каԓиташтухуӈ, тыхуԓьштухуӈ. Нич’’ нюувдехе’’ майпёштухуӈ, выӈкай ӈайватаха’’ тохоԓампёштуч. Непоӈ Няматаԓакуԓма дяԓяхана ни нюмч нятапёшь Надымхана канӈаханьш. Таньняна «Кочевая семья» нимита конкурсхана мянаԓьш таӈок нешай’’ поӈкна няхамты местам канаӈаш’’.

Владимир Игрумович ветеран Ямала, ветеран трудаӈӭ тунԓы. Хомана мансԓаманта де’эмня пыта веԓву’’ мимы куԓкаԓи’’ почетный҆ грамота’’, благодарственный҆ патԓота’’ тадя’’.

Автор: Лариса Айваседо патмы