Танякуй’’ дяԓяхана’’ Таԓкахай школа-интернатан шитчет дю’’ ӈок ӈашки’’ мас-реслинг нимита спорт дет ӈайта мастер-классан ӈомаш’’. Ӈашки’’ тохоԓампюмэхӭн тренерхин Юлии Пяк, Ильи Кушнирюк. Шичеч нятапёмэхӭн нешаӈк Андрей Вэлло ними Мирон Салиндер. Пытоӈ куше мас-рестлингхана мянаԓмам ӈычимчеӈа’’, чики спорт’ дет ӈайта’’ тапяку’’ кэтӈа’’. Выӈкна диԓина’’ нешади’’ ню’’ нэхэԓумпюԓмам хашаӈоӈа’’. Таньше шана’ко мянаԓма выӈкай диԓивсохот ӈычимы шеԓ.

Ӈаԓка Россия дяханана мас-рестлингим шича дю’’ пуӈ чена шеԓкта спортӈэ тонԓаӈатоньш. Четаӈ маньԓе мат’дю’’ шича дяхана шанако тохоташту’’. Ямалхана ӈупчики таньше мянаԓьшту’’. Юлия Пяк куптана мас-реслинг дет тохоԓкома секцим шеԓтама вивӈутым няамӈаш. Юлия Владимировна таньдет Якутии няна физический культураӈ, спорт дет ӈайта Чурапчинский институтхана тохоԓкуш. Тай’’ня Ноябрьскхана мас-реслинган тохотаман ха҆та’’ ӈаԓтана ӈашки’’ тохоԓымпишь. Навышуӈ таԓьша секцим Таԓкахана ӈайта «Северный характер» нимита центрхана найны’’, чикехена Юлия тренерӈӭ мэны. Таԓьша спорт хома, ӈамыԓихина нешиӈ нюӈк ӈаймята, нэхэмата таԓа.

Четаӈ Таԓкахай школа-интернатхана ӈупчики нэхэԓумпё тохотамаӈ дет ӈайта секцим шеԓтаӈаш, Каԓясамэхэна ӈай мас-рестлингим маньԓе тохоԓымпи’’.

Автор: Лариса Айваседо
Сидяӈг: Юлия Пяк