КАЗНЕ МАРХТА!

Ня шитнень пара куля сась Саратовскяй областьста. 2025 кизонь 17 декабрьста минь земляконьконди Евгений Михайлович Казанцевонди ульсь максф «Саратовскяй областень Почётнай гражданин» звания. Тя тифоль региональнай Думать заседаниясонза. Оцю казнеть Евгений Михайловиченди максозь Саратовскяй областень Губернаторсь Роман Бусаргин, Думань Председательсь Алексей Антонов.
Е.М.Казанцев аделазе Мордовскяй госуниверситетонь историческяй факультетть, Саратовонь государственнай правань академиять. Шачемас коре сон Теньгушевскяй райононь.
Васенценди почётнай звания мархта Евгений Михайловичень поздравляндазь «Шумбрат!» мокшэрзянь национально-культурнай центрань Саратовскяй региональнай общественнай организациянь активисттне. Вов мезе азсь сонь вятиец В.И.Кривошеева:
—Минь марятама оцю гордость Е.М.Казанцевонь инкса. Сон афкуксонь патриот, Родинань кельги ломань. Инксонза мзярдовок аф сави якстерьгодомс.
Оцю казне мархта, Евгений Михайлович! Кеме шумбраши и сяда оцю сатфкст 2026 кизоста.