ОЦЮ БЛАГОТВОРИТЕЛЬНАЙ КОНЦЕРТСЬ—АТЕРЬСА

Од кизонь карша Атерень РДК-са ётафтовсь «Своих не бросаем» благотворительнай концерт, штоба кочкамс средстват СВО-нь участникненди, эсь ломаненьконди—земляконьконди.
Эряви азомс, тя илати састь аф аньцек райцентрань эряйхне, но и пцтай сембе велетнень эзда. Залу ашесть тяльгонде ломаттне.
Средствань кочкамась ладяфоль РДК-нь фойеса. Ломаттне каясть ярмак, штоба марстонь вийса маласькофтомс сяськомать и лоткафтомс тя тюремать. Концертта инголи Краснослободскяй, Атюрьевскяй, Сире Шайгавонь райоттнень эса военнай комиссарсь Л.П.Беликов азозе, што К.А.Осин казьф Мужествань орденца (шавф). Орденоц максфоль воинть тядянцты Н.Я.Осинати. Рядовойсь А.В.Марфин казьф «За отвагу» медальса (шавф), кона максфоль рьванцты О.Н.Марфинати. «За отвагу» медальса казьфоль рядовойсь Ю.М.Николаев (шавф). Наградать получазе рьвац Р.Н.Юрина.
Военнай комиссарсь Беликов макссь младшай сержантти С.И.Федькинонди 2-це степенень «За храбрость» медаль.
Протоиерейсь Сергей Иванович Кувшинов Краснослободскяй райононь Од Кярьга велень Казанскяй Божий Матерень храмть настоятелец «Отцы России» региональнай правлениять эзда макссь наградат.
Медальса «Шагнувшие в бессмертие» казьфт: старшай лейтенантсь Надин Николай Фёдорович (шавф). Медальсь максф тядянцты Руськина И.Ф. и сержантсь Васькин Павел Дмитриевич (шавф), максф тядянцты Васькина И.Ф.
«Союз женщин Мордовии» республиканскяй общественнай организациять Грамотанзон максозень Атюрьевскяй райононь главать заместителец Надина О.Я.
Семейнай традициятнень кемокстамаснон инкса казьфт миртть-рьват Агишефне. Шамиль Илдарович—СВО-нь ветеран.
Тядянь трудть и оцю путксонкса семьять кемокстаманкса, семейнай традициятнень ванфтомаснон инкса казьфт Федькина А.Н. и Чудина Р.В.—тядятне, конат шачфтсть-касфтсть Отечествань аралайхть, СВО-нь Геройхть.
Няфтемок эсь оцю кельгомаснон и седи ваксстонь благодарностьснон залса озада ломаттне стяда и кядень цяпазь васьфнезь сембе казьфнень.
Мероприятиять пингста няфтьфоль концертонь программась, кона аноклафоль тяддень «Шумбрат, Мордовия!» республиканскяй фестивальти-пялькстомати. Эсь моронзон моразень Российскяй авторскяй сообществань авторсь и морайсь, Краснослободскяй районца шачфсь Александр Пужайкин.
Кочкаф средстватне, 132 тёжянь цалковайсь, прважавихть СВО-нь участникненди эрявикс вешфксснон пяшкодемс.
Владимир ЕРМИШЕВ.