КЕЛЬГСАЗЬ ЭСЬ ШАЧЕМА — КАСОМА УЖЕНЯСНОН

Атюрьевскяй райононь Оцяду велень поселенияса кафта оцю мокшень велет. Нят Шяйгужесь и Од Кярьгась. Мзярда-бди синь кайгсть лемсна республикать келес. Тяста лиссь лама асу и содаф ломань. Лац содафтольхть лемсна Роман, Алексей и Василий Равочкиттнень. Кафта браттне врачтольхть, колмоцесь — школань директороль, учителель. Од Кярьгаса шачсь филологическяй наукань кандидатсь, Н.П.Огарёвонь лемса филологическяй факультетонь кафедрань заведующайсь М.З.Лёвина, Шяйгужень журналистсь и идень писательсь И.А.Шукшин. Тяса эрясь лама Великай Отечественнай войнань ветеранда Е.Е.Шукшин, В.И.Жаткин, И.Л.Шукшин, И.И.Путяйкин, лиятне. Кепотьксонди, тянивок Од Кярьгаса эряй педагогическяй трудонь ветеранць, Атюрьевскяй районца содаф математикань тонафтысь, шнама мокшалясь С.Е.Шукшин. Велень школати макссь колмогемоньда лама киза. Сонь учениконза аф весть лисендсть сяськикс предметнай олимпиадатнень эса. Начальнай классонь учителькс покодсь и рьвац, Дарья Петровна. Сергей Емельянович учителень династияста. Школаса трудендакшнесть родителенза Емельян Емельянович и Евдокия Ивановна, лия раднянза.
Инь сире эряйкс Од Кярьгаса лувондови В.Т.Шукшин. Теенза 85 киза. Сон трудендакшнесь «Красное знамя» совхозса водителькс. Шяйгужеса эряй войнань пингонь идсь Н.И.Сиркина.
Мзярда-бди ня велетне пяшксельхть шабада. Ульсь Од Кярьгаса средняй общеобразовательнай школа. Тяни сон сёлкф. Од семьят пцтай аш. Да и синцьке велетне солайхть тундань ловкс. Кепотьксонди, Шяйгужеса пропискас коре 96 ломань. А афкукс эряйда сяда кржа. Пцтай сембе синь эряфкшу ломатть. Шяйгужеса лац содаф Сиркиттнень семьясна. Василий Иванович—трудонь кельги. Вахтань методса якай Москуву добувама. Валентина Дмитриевна—Од Кярьгаса фельдшерско-акушерскяй пунктонь заведующай, пчкафты кафта велень эряйхнень эса. Кафта стирьсна, кафта уноксна. Марина Васильевна—врач-невролог, Наталья Васильевна—финансовай аналитик.
Сембе эряфсна сотф Шяйгужеть мархта Рыськиттнень. Пётр Петровичень сонцень нешкоперец, кирди жуватат. Анна Васильевна трудендай «Стрельниковское» ООО-са, мишенди Од Кярьгань лавкаса товархт.
Оцю семьясна Ярмиттнень. Иван Семёнович и Анна Ивановна—трудонь кельги ломатть. Мархтост эряй цёраснон семьяц. Наталья и Владимир Ярмиттнень колма идьсна. Оцю цёрасна Москуса, Дмитрий и Александр тонафнихть нинге школаса.
Тяни и Од Кярьгаса, и Шяйгужеса, пцтай мезевок аш. Но ломаттне эряйхть тяса. Кельгсазь эсь шачема-касома уженяснон, ванфтсазь эсь койснон-обуцяснон.
—Ломаттне тяса трудонь кельгихть,—корхтай В.Д.Сиркина.—Эсь пингстонза пцтай сембе синь покотькшнесть «Красное знамя» совхозса дояркакс, телятницакс, механизаторкс. Лемсна синь кайгсть велеса, районца. Да и тянивок кирдихть жуватат, касфтыхть перень сёрот. Тевфтома аф лядондыхть.
Афкукс «Красное знамя» совхозса трудендакшнесть ломаттне семьянь келеса. Тянемс цебярь славась моли Анна Семёновна и Пётр Кузьмич Юфтайкиттнень, Пелагея Фёдоровна Петровать, Лидия Фёдоровна Сиркинать, Иван Трофимович Шукшинонь, Мария Алексеевна Кабаевать и лиятнень колга.
Илья ВЕШКИН.