НАДИЯЗЬ ВАНЫ ВАНДЫЕНЬ ШИТИ

Темниковскяй районца ули Кушка веле. Хуш и лувондови сон рузоннекс, но эряйхнень сизьгемоньшка процентсна мокша ломатть. Эсь пингстонза синь сашендсть тяза покодема и эряма Атюрьевскяй райононь Крхтаж, Атерь, Каргоньжяй, Сире Кушка, Бораж и лия велетнень эзда. Пуропнесть семьят, нолясть юрхт.
Вов и М.И.Мартышкинаське шачемас коре Атюрьевскяй райононь Кяшалня (Духонькина) веленне.
—А кода Кушку повоть эряма?—кизефнеса Мария Ивановнань.
—Тяза пачфтемазь аф тёждя эряфоньке,—отвечась мокшавась.—Алязе кулось рана. Тядязе лядсь кота идь мархта. Кадоськ Кяшалнять и саме эряма Кушку. Тяса тядязе рамась куд. Тя кудса касфтомазь, нолямазь оцювонь эряфти. Тоса лисень рьвакс. Тяфта тянемс и эрян.
Велень хозяйствань ветерантть родителенза, Анна Андреевна и Иван Михайлович, трудендакшнесть Ждановонь лемса колхозса, касфтсть кота итть. Сембось синь мольсь аф кальдявста. Апак учсек зиянць чакась кенкшезост. Кулось семьянь азорсь, кота идень алясь Иван Михайлович. И Анна Андреевна кярькс идь мархта арьсесь самс эряма Кушка вели. Мария семьяса инь оцюсель, сембоса лездыня и надияма вастоль. И стирнясь лезнесь тядянцты кудонь тевса, касфтомс инь ёмлатнень.
—Пяк ужяль,—корхтай Мария Ивановна.—Но кототнень эзда лядсь ни колма. Кулсесть ёфси одняста.
Школань аделамда меле Мария Ивановна лядсь вели. Ошень колга ашезь и арьсекшне. Эрявкстсь лездомс тядянцты. Сявозь покодема «17 партсъезд» колхозу дояркакс. Тяса эряфоньберьф и трудендакшнесь. Трудонь кельги мокшавась тянемс аньцек лямбе валса лятфнесыне Ольга Серафимовна Ишаевать, Татьяна Ивановна Рябцевать и лиятнень лемснон, конат колмогемонень и сяда ламонь киза потьнесть фермаса тракст. Ашельхть аф ваймама шисна, аф отпусксна. И вестевок ашесть пеняцякшне эсь эряфснон лангс.
—А кинди пеняцямс? Траксненди, што ли?—шутендай Мария Ивановна.—Синь тянь аф шарьхкодьсазь. Жувататне эрь шиня андомат, симдемат, урядама вастсна, потямат. Кой-кона тракссь лия ломанть алонза афи нолдасы.
Мирдец, Пётр Фёдорович, ульсь Боражень. Сон тожа трудонь кельги семьястоль. Кулось пяк рана. Трудендакшнесь тяфта жа «17 партсъезд» колхозонь фермаса скотникокс. Кизонда ванць колхозонь жувататнень эса. Шнама ломанель.
Мария Ивановна и Пётр Фёдорович касфтсть кафта стирьхть. Ольга—медсестра, эряй и покоди Саровса. Марина эряй Домодедоваса. Касфты колма итть. Сон кудазорава.
—Мезе азан, эряфсь вишкста ётай,—поладозе Мария Ивановна.—Сембось бта ульсь исяк. Улень од стирькс, лисень рьвакс. Шачфтонь кафта итть. Трудендакшнень дояркакс. Ашень кенере фатямс, 71 кизозе, сась сирешись.
Но сире ломанькс Мария Ивановнань лемдемс аф шарфтови кяльце. Сон нинге отькорь. Хоть и эряй ськамонза, кирди жуватат. Тувонза, куднармоненза. Ульсь пинге, тракстка кирнесь.
—Эрямс велеса и аф кирдемс жуватат, ня ломаттнень ёфси аф шарьхкодьсайне,—корхтай мокшавась.—Тяни эрь шобдаваня стяян, пидян-панян, аф кода эстеень, кода жувататненди. И фалу тев мархтан. Шитне лиезь лиихть.
М.И.Мартышкинась пенсиясовок аф содай ваймама. Эряфкшу сон аньцек кизос коре. А тяфтак нинге кафта од ломатть тии.
Тушенды историяв 2025 кизось. Кодамкс сон ульсь М.И.Мартышкинати.
—Пеняцямс аш мезень лангс,—корхтай мокшавась.—Монь прясон аньцек фкя, штоба сяда вишконяста аделаволь специальнай военнай операциясь, Родинань аралаеньке сальхть шумбраста-тазаста куду. Ляды цебярьхне-кальдяфне тянь ваксста афи няевихть.
Илья ВЕШКИН.