ЛИТЕРАТУРНАЙ СТРАНИЦА

Данил Александрович Любимкин шачсь Ковылкинскяй райононь Ёжка велеса 1937 кизонь 8 мартста.
Тонафнесь школаса, покодсь эсь велень библиотекасост. Меле аделась Краснослободск ошса техническяй училища, но покодема вели изь мрда—тусь Саранскяи, музе вастонц «Мокшень правда» газетать редакцияса. Тянди лездсь земляконц, писательть Михаил Лукьянович Сайгинонь мархта васедемась-корхнемась.
«Мокшень правдаса» Данил Александрович покодсь 45 киза. Ульсь ответственнай секретарькс, вятезе сёрмань отделть. Тянивок пара валса лятфнесыне газетать ингольдень главнай редакторонзон, конатнень пингста работась—Ф.С. Руськинонь, В.М. Сурковонь, Н.И. Учватовонь, П.П. Кулешовонь, И.С.Лушкинонь.
Цебярь работанкса ламоксть казьфоль Почётнай грамотаса и питни казнеса.
Данил Александрович—творческяй ломань. Эсь пингстонза газетань статьяда башка тяшнесь азкст и стихт.
Минь, «Мокшень правда» редакциять коллективоц, седи ваксста поздравляндасаськ журналист ялганьконь малаткшни Од кизоть мархта. Арьсетяма шумбраши и пара эряф.
Тячиень газетать номерса кирьфтафста печатласаськ сонь азксонц.
КЕЛЬГОМАТЬ ПАЦЯНЗА
Данил ЛЮБИМКИН
˂...˃Нинась опаптозе летняманц, пуроптозень сембе виензон и кельме цярахманкс ёрдазень ялганц шамас валонзон:
—А кда тядякс арама аф кондястян! Эста мезе лиси? Андрейтьке юмафтса, монцьке эряф аф няян. Кельгса сонь. Сяс аш мялезе коламс павазонц. Пингсь штасы сярятьфонц.
—Ва-ай, эй-эй, о-ой!— Валянь кургоц келес панжевсь, сон ашезь мушенда валхт, азондсь мезе пови кяльбрязонза, штоба таргамс пингть и пуроптомс эрьготьф, срафтф-калафтф мялензон.—Да коста повсь прязт, кие мярьгсь?
—Ащелеть ковда ламос тя койкать лангса, прязт аф тяфтама поволь. Вдь казф пакарьхне токафт. А тя вастса авань сембе паршихне сюлмафт.
—Афкукс ёньцта лисеть ару кожфтома.—Валясь кайгиста рахазевсь, вайгяльсонза марявсь цинняма. Сон стясь, ётась палатава и келес панжезе вальмять, варжакстсь ульцяв, кона пяшксель увфта, ломанень кайги вайгяльда. Сяльде мрдась ялганцты, молембачк пшкядсь:—Вов, штак ару кожфса прястот пульть, валдоми.
Валянди тя пингсь сатсь, штоба самс эсезонза, кочкамс валхт ялганц сетьмофтемс. Озась Нинать ваксс, кафта кядьса кундазе прянц, палазе пуня шалхконянц и пилезонза тошказевсь:
—Вай, Нина, кодама дураконят... Седиезе лонтядсь: мярьгонь, мезе лиссь. А сон вона кода... Прязонга ашине путне... Да вдь ульсь тянь колга корхнеманьке врачнень мархта. Маргарита Павловна стане и азозе, кле, одонь пакарсь шта лаца. Аньцек ладяк лац, стане таргасы, вастоцка аф кармай содавома. Пчкафтсаськ, кле, стане, хуш гимнастонь соревнованияс кучк.
—Тя виде?—эреклась Нинась.—А мон, арьсень, лядан калада яксяргокс. Цебярь ронгфтома кодама ся ава—судфтома шуфта лаца.
—Аф лядат. Аньцек пчкамда меле ронгцень якамста пяк тяк лакафта. Шарьхкодеть?
—А мес?
—Цёратне мельгат кармайхть пяярема. Синь тя коське ёндолкс лядьсыне.
—Ворьть, порга сельме,—Нинась сурбеса пупстадезе ялганц коняти.
Валясь шарьхкодсь: мекольдень валонза сетьмофтезь Нинать, солафтозь седиенц и тяни старандась прокс петемс мяленц.
—Рьвяятама Андреень мархта, шачфтан стирня и кафта цёранят. Тяни ламонь аф шачфнихть—ваннихть аш. Аньцек васенцекс—стирня, эстейне лезды.
Валя чокштадезе Нинать трвас, стясь. Варжакстсь частонзон лангс.
—Вай, стирнят, ласькозь. Работама поздасаськ.—Кенкш лангса ни шарфтсь, чипордазе Нинати сельмонц.
—Тяк юкста, Нина, стирня...
—У-ух, пси коня! —Нинась кожфти крхмадезе пря суронц.
Мзярда стирьхне лиссть больницяста. Валясь азозе ялганзонды:
—Мон саттядязь. Почтав эряви сувамс.
Стирьхнень тумда меле Нинась нинге ламос пеедсь, кунцесь шинь нумолнят, лятфнезень Валять валонзон васенце стирнять колга. Но кодак боконц лангс эрекста шаркстомста сярятьфсь сялгсь копорезонза, валда мяльхне тундань вармакс лийкстасть прястонза: «Пади, аньцек сетьмофнесамань Валясь,—омбоце ковсь ни больницясан, а сярятьфсь аф ётни». Лятфтазе Андреень. «Мезе, шта, арьси колган?» Шашфтозе тумбочкань вярце ящиконять, таргась пусма сёрма. Таргазе конвертста фкять, исяконь получафть. Мольфтьсы сельмованфонц строчкатнень ланга. Мзяра эсост лямбода!
«Шумбрат, Нина!
Тага звонцень. Отвечась Валясь. Кле, нинге Нижняйста ашеть са. Коль кштият-морсят. А монь седиезе мяштьсон шави-кшти—валня эздот аф учеван. Тняра пинге туть и адресцень ашить када».
Нина конезень сельмонзон, стакаста куфкстсь. «Эх, Андрей, седиень эжди ломанезе. Мезевок тон ашеть юкста. Сембе ётафоньке анцяйняньбес педсь седиезт. Кали явихть киньке...»
«Нина, пчкяль тячикиге лийксталень тейть, вирень гуленяй. Вдь тяни монцень пацяне улихть. Мяльце содамс, кода муйне. Кулхцонтт ина. Сякокс шумоце инголен оцю. Мрдат—анан кядьстот ответ эрь сёрмазень лангс. Вов тяфта, пуня шалхка вирень гуленя.
Ну, так пацятнень колга. Исяк васенцеда лиендень ськамон, инструкторфтома. Кодак нолдайне двигательхнень, кодак вяшкозевсь турбинась, кодак трнатозевсь самолётсь, монцьке кармань трнатома, щамне ливозть эзда копорезон педсть. И вдруг маряйне, бта фталон, инструкторть вастса ащат тон. Мрдась кядненди вийсь, валдомсь прязе. Уезевсь инголен модась. Налкс кеподсь самолётсь. Варжакстонь вяри—эхи сенем менельсь, ёфси сельмотнень тюсса, мзярда пеедят. Шарфтыне сельмованфозень алу—мазышись кодама! Модась пиже парьхциса шады, а тя парьхцись ляень сенем тюсса мазоптф. Китне лентакс таргафт. Ётксост миннетьке приметайне. Ичкози няят вярде, а киньконь пенц сяка сельмованфса ашине сата. Васенцеда эряфсон маряйне, бта аф инь эрек нармоньда вишке самолетса лиян, а кельгоманьконь пацянзон лангса. Вийда ня пацятнень эса! Синь шитивок аф крхтавихть, менелень кельмотивок аф сяськовихть. Мезтивок белай светса аф максыхть пря, мзярда лангозост лийхтяма мархтост фкя-фкянь кядьс кундафста...»
Нина вельхтязе шаманц кагод лопаняса и летнязевсь. Сяда тов лувомс виец ашезь сата. «Мезе, мезе максан тейть, Андрюша, кельгомацень инкса?! Эздон ломань, улема, оду аф арай. Вов кода эряфса уленди: павазть эса лама-лама кочксят ямкскянь- ямкскя, а тисак весть аф ся аськолксть, и сембось юмай сельгонь прамс... Ся минутаста кельгоманьконь пацянзонга лангса улеть ськамот, кельгомняй. Кда лиелеме кафоненк, тяфта афоль лисе».
Афкукс, ся шиня павазсь шарфтсь Нинань эзда. Сменась ни аделсевсь. Комбинатонь строяйхне кочксезь-урятцезь инструментснон, варжакснесть частснон лангс. Кшнинь ферматнень эса вяшкондсь-сувсь мартонь кельмаза вармась. Нинась и бригадироц сменать аделамс арьсесть кемокстамс вастозонза железобетоннай мекольце плитать. Кеподемань кранць сонь ладязе ферматнень ёткс. Нинась ёрась ланганза ётамс тона пети и «фатямс» сваркаса. Аньцек аськолдась, марязе мастерть кяжи вайгяленц:
—Коза тон, шава пря?!
Тя пингть Нинать бта мяштти эрьхтезь—тяшкава вииста општадсь вармась. Нина шятясь эи плитать лангс, пильгоц курькстсь, и стирсь лийкстась алу.
Сась ёжезонза, аф содасы, мзярда. Панжезень сельмонзон: валда комнатаса ащи, вакссонза акша халатса ломатть. Пряц увнай, ронгсонза оцю сталма и сярятьф.
—Кода марясак пряцень?—кульсь вайгяль. Нинась ёрась шаркстомс, но афи тарозевсь—ронгоц бта пинкстаф.—Ащек сетьмоняста,—кошардозе сяка вайгяльсь и сяда ляпоняста поладозе:—Ули павазце, стирь. Кда аф сери ловсь, кати-мезе улель мархтот... А тяни пчкат, аньцек кирдемс сави аф ламос.
Нинась марясь лафтусонза ляпе кядь.
А сон верондась, надиясь пчкаманцты, кеняртькшнесь тундань валдти, хуш и ронгсонза марясь сярятьф. Весть Нинась ёрась тердемс сестрать—сась симомац. Люпштазе стенаста кнопканять, и аф лама пингта меле палатав сувась сярядиень щамса ава. Симдезе Нинать ведьта, озась кроватенц крайс и кармась кизефнемонза, кода да мезе лиссь мархтонза. Нинась азондозе, кода работась монтажницакс стройкаса, кода вармать пингста курькстсь эи плитать лангста.
—Ва-а-ай, стирькай, таргазе авась,—кальдяв тевце... Лацот ломань содань... Дак, теенза врачне шачфтомда исть мярьге... Тядякс, сюдофсь, изь арав.
Бта толмар Нинань пря потмосонза крьвястсть ня валхне. Шинек-венек крфай и крфай тя толнясь, пици стирть эса, вихонзафнесы сярятьфонц. «Лядонь видьмофтома панчфокс,—арьси сон.—Дяряй, тяфтама ялга эряви Андрейти?» Кода ашезе кошяря Валя ялгац сёрмадомс Андреенди, Нина ашезь согласиндакшне. И мзярда ся шобдаваня колма стирьхне тусть Нинань ширде, Валя ласьксь почтав и кучсь Андреенди телеграмма: «Нина стакаста сяряди, сак».
Андрей палатав аф сувась, а лийкстась. Лоткась Нинать койканц ваксс: «Нина!»—Стирти-арам, вайгялец вов-вов сязеви, сяшкава сон циннясь.
—Нина, мезе мархтот?
Андрей арась плманжа лангс, токафтозе кяденц стирть шяярензонды. Нина варжакстсь лангозонза и нльне эводсь: сельмонза келемфт, нльне лангу лиссть, шамакедец арась саразонь кедькс. Стирське ашезь мушенда валхт. Кафцьке ащесть мзярс кашт аф молезь и ванцть фкя-фкянь лангс.
—Тяфта лиссь, Андрей,—меколи пшкядсь Нина.—Улема, ся пингоня павазсь шарфтсь эздонк... Вов и тапавонь...
—Мес сёпить эздон!?
—Кие содасы, кодамокс лядан... Колаф кядьгонясь, Андрей, аф кочкави... Мон ськамон...—Нинась ашезе адела корхтаманц, шарфтозе прянц, штоба афоль няев шамац. Но Андрей приметазе: Нинать сельме ужестонза таргавсь валда китькскя. Цёрать седиец люпштавсь, бта потмостонза уендезевсть волнат. Тя минутаня срадсть-лийкстасть лама пингонь арьсеманза, бта Нинась юкстазе сонь, мусь лия. Аф! Нинась кельгсы сонь. Кельгсы ингольцекс.
—Стака пингста юкстайть ялгацень,—аф смелста апряказе Андрей.—Да тяни медицинась... Семботь тисазь... Аньцек улеза ялгацти пси седице...—Аф ламос арьсесь, поладозе.— Мон сейчас, Нина,—и эрекста лиссь палатаста.
Андрей коридорга эряскодсь ординаторскяи. Сон марязе, бта тага эвондасть пацянза. Синь лийфтезь сонь. Цёрась содазе тяни, мезе тиемс. Сон стяфтсыне пильге лангс сембе врачнень, штоба пчкафтомс Нинать.