СОДАВИКС АРТИСТКА ДЫ ПАРО ЯЛГА
Кода-бути весть интернетсэ эртевинь «Авкай, молян мон вирев» эрзянь моронть лангс, конань пек парсте морась асодавикс ава. Вайгелезэ гайтев, лиянь ёнов а молиця, валтнэсэ моры теке алкуксонь эрзянь ломань. Вай, арсян, паряк интернетэнь «паксятнес» лиссь эрзякс од морыця! Те ульнесь Валентина Собанцева. Карминь вешнеме, мезе ули сондензэ сёрмадозь, кодат моронзо вастневить интернетсэ. Фототнестэ лангозон вансь мазый ава, рузонь ламо моронзо вастовсть «Одноклассники» ды «ВКонтакте» социальной сеттнесэ. Карминь содамо лиядонтькак: Валентина Собанцева — РСФСР-нь заслуженной артистка!
Апак визде тердия Валентинань ялгакс. Сон эзь покшкавтне. Кевкстия, кодамо раськень сон ломанесь — истя парсте моры эрзякс… Паро мельсэ Валентина Николаевна ёвтнесь эсензэ эйстэ. Тетянзо кувалма ундоксонзо эрзянь, Мордовиянь Дубёнкань буень Кайбизелень (рузкс Кайбичево). Тосо чачокшность морыцянть тетязо ды покштязо, конатненень савсь ютамс Ине Отечественной войнанть; тосо нейгак эрить роднянзо-раськензэ, конатнень марто авась кирди кеме сюлмавкст (натой зярыяксть Валентина Николаевна сакшнось Кайбизелев концерт марто!). Войнадо мейле тетязо важодсь Саратов ошсо прорабокс. Тосо 1950-це иень умарьковонь 26-це чистэ чачськак тейтерезэ. Морыцясь кортамсто свал тешксты: келя, чачсь тосо, косо Лидия Андреевна Русланова эрзянь раськень ломанесь. Саратова ёнксонь велесэ, сырькаензэ кедьсэ, вишка Валя сеедьстэ тейниль шабратненень «концертт». Зярдо кулось Валентинань авазо Александра Петровна, тетязо тусь тейтерензэ марто Уралов. Школанть прядомадо мейле Валентина мольсь важодеме «Уралмаш» заводов крановщицакс.
Заводсонть пек парсте аравтозель художественной самодеятельностесь. Тосо ушодовсь тейтеренть морамонь шкинемазо; тосо Свердловонь филармониянь Весероссиянь эстрадань искусствань шкинемань мастерскойсэнть сонзэ тонавтызь морамо; тосо Валентина кемгавксовоце иесэ лиссь мирденень ды теевсь Собанцевакс. Сергей мирдензэ марто сынь те шкас эрить вечкезь, вейке-вейкень чарькодезь.
Зярдо заводонь самодеятельностень артисттнэ Московонь ВДНХ-со ютавтсть концерт, Валентина Николаевнань маризе-редизе СССР-нь народной артистэсь, композиторось, М. Е. Пятницкий лемсэ Государственной академической рузонь раськень хоронь художественной прявтось Валентин Сергеевич Левашов. Сон тердизе Собанцевань конкурсонь кунсоломас, конадонть мейле мерсь тензэ: «Сайтян хорс конкурстомо! Зярдо сы теть хоронть пельде тердема, сак!». Истя Валентина теевсь пек содавикс хорсо морыцякс. Кавто иень ютазь Сочисэ советской моронь морамонь пелькстамосо Собанцева Лариса Долина марто саекшнесь омбоце тарка. Валентинанень макснесть ушодомс хоронь репертуарсто ламо морот, сон теевсь ветиця солисткакс. 1987-це иестэ тензэ максозь РСФСР-нь заслуженной артисткань лемесь.
Пек ламо масторсо ульнесь Валентина Николаевна хоронть марто. Саемга, 1986-це иестэ 54 чить морсесть Италиясо. Ватикансо морыцясь вастневсь мик Павел Иоанн II Римень церьковань сестэнь прявтонть марто.
1990-це иетнестэ эрямось стакалгадсь. Хорстонть тусь В. С. Левашов, мельганзо — ламо морыцятне. Сынст ютксоль Валентина Николаевнаяк. Сон ушодсь морсеме ськамонзо. Кадызе тейтерензэ Сергей мирдензэ лангс, конанень сестэ а косоль важодемс, колмоксть ардтнесь Америкав, морась тосо эмигранттнэнь икеле — эрявсь трямс-кастомс эйкакшонть ды кирдемс семиянть. Моронзо пек парсте вастсть тиринь масторост кисэ тошнакалиця ломантне…
Валентина Николаевна максызе тень телефононь номерэнзэ. Минь мартонзо карминек кортнеме моротнеде, морыцятнеде, эрямодонть. Сон сонсь тейни эсензэ ды лиянь моротнень лангс клипть — тонавтызе нуцьказо. Корты: «Мелем невтемс аволь ансяк рузонь моронть — мазый оршамонгак!». Эряви ёвтамс, Валентина Николаевна пек ёроковсто коды уськесэ, кечказсо, кодамонь машинкасо сценалангс лисемань оршамот. Сонзэ костюмонзо киньгак ёнов а молицят. Эсензэ теевть оршамот сон казнесь морыця ялганзо туртовгак. Сынст ютксо Мордовиянь народной артисткась Александра Куликова. Сонзэ марто сынь вастовсть ды теевсть содавиксэкс эрзянь Оркина велесэ кенярксчисэ. Самара ёнксонь те велесь Валентинань сырькаензэ веленть эйстэ авасоло. Тосо Валентина Николаевна васенцеде морызе эрзятненень «Авкай, молян мон вирев» раськень моронть, конань мейле казизе Александра Куликованень.
Мон кучинь Валентина Николаевнанень эрзянь эсь вечкевикс морыцятнень зярыя сёрмадовксост. Сонензэ ламот вечкевсть, сехте пек — Михаил Седойкин. Сонсь муинзе интернетстэ Михаил Григорьевичень моронзо, вешинзе кедьстэнь фотонзо ды тейсь моронзо коряс мик кавто клипть. Валентина Николаевнань абунгавтызе, кода Михаил вечкилизе раськензэ, кодамо мазый вайгелезэ, зяро морот морась эрзякс. Вейке клипентень сон натой тейсь сёрмадовкс: «Герой нашего времени».
Михаил Седойкиннэнь мон ютавтынь эрзянь кельс 16 морот. Ёвтыя Валентина Николаевнанень мелем сонензэяк ютавтомс моро эрзякс. Сон эзь карма молеме каршо ды кучинзе тень «Деревенька» моронть валонзо, конатнень сёрмадынзе Н. Клюева. Мон ютавтынь, лавшо таркатнень валакавтомга пшкадинь Мария Ерёмина поэтэнтень. Сюкпря Мариянень лездамонзо кисэ.
Валентина Николаевна кармась моронть тонавтнеме. Морасазо валрисьменть — кучсазо тень телефонга, кевкстьсамам, видестэ-аволь ёвты валтнэнь, истя-аволь путы валвачкодькстнэнь. Весе сонзэ кондя тонавтневельтькак моротнень… Астяко тензэ максозель заслуженной артисткань лемесь!
2023-це иень Эрзянь келень чистэ сон казизе тенек те моронть.
МОНЬ ВЕЛИНЕМ, ВЕЧКЕМА ВЕЛИНЕМ
А велявтсак ютазь эйкакшпингенть,
Ды а сы мекев, велем, од шкат.
Мельсэнь, кода шабрань тейтерентень
Виздезь-вечкезь казсь цёрась цецят.
Мороюткось:
Монь велинем, вечкема велинем!
Садпиресэ умарень чине!
Кинь учи тосо чувтонь эземнесь,
Кинень мизолдыть пейделькатне?
Мелявкстнэде сорнозеви пойнесь,
Тон, вечкемам, эрят седейсэнь,
Онстон яла некшнян тея яннэть,
Лангаст ютамо тердят эйсэнь.
Каштомсто таргазь кшипечтень чине,
Стольлангсо кукшинсэ ловсыне,
Олгсо вельтязь кудонь латоприне,
Толпандянь пидезь пецёнкатне.
Мороютко.
Ней прок довакс, велинем, кадовить,
Чиремсть кудот зярыя иес.
Ней тон, велем, ломантеме, чамить,
Ды ёмась монь ким эйкакшпингес.
Мороютко.
Нейгак Валентина Николаевна секе-тев морси эрьва кодамо концертсэ. А весть сонзэ тердтнизь Андрей Малаховонь моронь передачатнес. Сон свал моры оймень путозь, теке пек паро ялганзо туртов, канды-невти рузонь моронть мазычинзэ, сэрей смустензэ неень шкань эрицятненень.
Тедеде Од иентень алтазь концертсэнть, кона невтевсь рузонь моронь «Жар-птица» каналсо, Мордовиянь заслуженной артисттнэнь Александр Бардин ды Инна Каменева марто Валентина Николаевна ульнесь ветицякс. Прянь кепедезь сон яволявтсь: «Кадык Россиянь заслуженной артисткан, ундоксон эрзянь». Ды паро мельсэ ушодызе «Авкай, молян мон вирев» моронть.
Мельспаросан — ули истямо вадря ялгам. Сон моры оймевиень путозь, мерят сонсь эризе сень, мезде моры. Паряк, секс сон пек малавикс ды чарькодевикс кунсолыцятненень? Паряк, секс сонзэ вечксызь тиринь масторсонок ды сонзэ томбалеяк?..
Тедеде Валентина Николаевнанень топодсть 75 иеть. Ульть шумбра, уцяскав, икелепелевгак кандт ломантненень кеняркс моросот ды мазычисэть, вечкевикс ялгинем!
Римма ЖЕГАЛИНА
Валентина Собанцева - заслуженная артистка России,
обладательница уникального природного голоса и музыкальной интуиции.
Родилась в Саратове - на родине знаменитой Лидии Андреевны
Руслановой, которая пела на русском языке, но была эрзянкой. Отец после Великой Отечественной войны жил и работал в Саратове прорабом. А после смерти жены Александры Петровны уехал с дочкой в Свердловск, где жили многие его земляки.
После окончания школы Валентина Собанцева пошла работать крановщицей на Уралмашзавод. На предприятии была высокого уровня самодеятельность, где Валентина начала свои первые шаги в творческой жизни.
С заводской самодеятельностью будущая артистка приехала на гастроли в Москву. Выступили на ВДНХ.
В Москве Валентину Николаевну услышал композитор, художественный руководитель хора имени Пятницкого, народный артист СССР Валентин Сергеевич Левашов, и пригласил на прослушивание. Она спела песню «Сладка ягода», и Левашов сказал: «Я вас беру в хор без конкурса. Когда придет вызов, приезжайте». Она была принята в знаменитый хор.
Уже через два года работы в хоре имени Пятницкого Собанцева в конкурсе советской песни, который прошел в Сочи, вместе с Ларисой Долиной была удостоена второй премии.
А в 1987 году стала заслуженной артисткой РСФСР.
Валентина Николаевна побывала с хором в десятках стран.
В 1986 году 54 дня продолжался творческий вояж хора по Италии. А в Ватикане состоялась встреча Валентины Собанцевой с Папой Римским Павлом Иоанном II, которому она подарила сувенир.
С началом перестройки Валентина Собанцева начинает сольную карьеру. Три раза ездила в Америку, пела там для эмигрантов, зарабатывая тем самым на жизнь.
Также Валентина Николаевна познакомилась Николаем Рыжковым. Он приходил на концерт, на который его пригласили сама певица и автор более 20 песен ее репертуара, талантливый композитор из Белоруссии Сергей Косточко.
Главное для нее – петь так, как поют в народе: всем сердцем, всей душой, проживая судьбу песенных образов как свою собственную. Работая на сцене самозабвенно, с полной отдачей, “на износ”, она близка и понятна каждому: на ее выступлениях нет равнодушных зрителей. Ее искусство с восторгом принимают и скромные труженики села в нашей стране, и искушенные меломаны в Италии, и строгие критики школы Линкольна в Америке.
На эрзянском языке спела две песни: народную "Авкай, молян мон вирев" и " Монь велинем, вечкема велинем" ("Деревенька", переведённая на эрзянский Р.Жегалиной).
К 75-летию певицы посвящена и эта публикация в московской газете "ПЕТРОВКА 38."
Комментарии 1