Больницаын дырме телефонын бугыръяськыса ортчытӥсько, тунсыко туспуктэмъёсты шедьтӥ но возьматыны соосты дыртӥсько тӥледлы.

Та туспуктэмын ортче Нылкышно вӧсь (Куазь зорон вӧсь но шуыло) Вуж Варашын. Йырвизь уг ке пӧя, 2019 арын инвожо (июнь) толэзьын вал со. Вӧсясе быръемын вал мынам песяй Минигалиева Мадия (1940 г.р.). Бусыосы ю кизем бере куазь кема уг зоры ке, тросаз удмурт гуртъёсын потало ураме вуэн пыласькыны, сыӵе йылол зорез вае шуылӥзы пересьёс. Вуж Варашын пыласькон сяна нылкышноос вӧсяськыны но ветло.
2019 арын инвожоын мыным 8 арес вал, со нуналэз умой тодӥсько ай мон. Лымшорлэсь азьвыл калык ветлӥз куалы быдэ улӥсьёссэз вуэн пылатыса, кутчан пушказы ву кисьтаса. Быдэс гуртэз ортчем бере вамыштӥмы Таки шае (бусыысь нимаз сылӥсь Таки нимо башкыртлэн шаяз), отысен Нимтэм шае (отчы октозы вал «нимтэк» муртъёсты: покчи нылпиос, кудъёссылэн пиньзы потымтэ на ай, мукет интыысь лыктыса та гуртэ кулэмъёсты, асьсэды быдтыса кулэмъёсты но куд-ог мукетъёсты), отысен бадӟымъёс гуртлэн шаяз мынӥзы, милемыз доре лэзизы. Бертэм бере огдыр ортчыса, песяен мынӥмы ми вӧсе. Нимаз вӧсяськон кылъёс Нылкышно вӧсьлы утиськымтэзы, песяй ачиз но гожтыса улыны ӧз малпа, соин кызьы быгатӥз озьы ик куриськиз ини. Пӧрасьёс пӧзьтӥзы 1 пурты ӝук но чай, мае вӧсямзэс уг тодӥськы ни, нош кема ӧвӧл кытысь дыр лыдӟем вал сыӵе вӧсяськонэ вӧсяно сьӧд курегез шуыса. Вӧсез усьтыса но ворсаса куриськимы. Доре бертэм бере ӝытпал лымшор палась тӧл пельтӥз но сьӧд пилемъёсты ваиз, шуныт зорен но туж гудыръяса зоризы лымшор палась зоръёс, луыны кулэ, куриськемъёс кабыл луизы.
Озьы со нунал радъяськиз. Туж умой, ку ке йылолъёс утисько. Тунсыкъяське удмурт йылолъёсын, ку ке соосты тодӥсьёсыз вань ай!